თბილისში ავარიას ორი ადამიანი ემსხვერპლა. შემთხვევა წუხელ მოხდა. არსებული ინფორმაციით, ჯერ ერთმანეთს ორი ავტომობილი დაეჯახა, შემდეგ კი ერთ-ერთის მძღოლმა საჭე ვერ დაიმორჩილა და ბოძს შეეჯახა.
არსებული ინფორმაციით, გარდაცვლილები არიან თამარ კვაჭაძე (გერმანიშვილი) და იაგო ენგიბარიანი.
„დიდი ტრაგედია მოხდა, ჩვენი თამარი აღარ არის. ახალი გათხოვილია, თელავიდან არის წარმოშობით, ახალი წლისთვის თელავში იყო ჩამოსული. გუშინ თქვა, სამსახურში უნდა გავიდეო და თბილისში წამოვიდა. ტაქსით მიდიოდა, როცა ეს ტრაგედია მოხდა. ფაქტობრივად, სახლთან იყო მისული, რომ მანქანა ბოძს დაეჯახა. მეორე გარდაცვლილი ტაქსის მძღოლია“, – გვიყვებიან თამარ კვაჭაძის ახლობლები.
როგორც Ambebi.ge-ს შსს-ში განუცხადეს, მომხდარ ფაქტზე გამოძიება სსკ-ის 276-ე მუხლით დაიწყო, რაც ტრანსპორტის მოძრაობის ან ექსპლუატაციის წესის დარღვევას გულისხმობს, რამაც ადამიანის სიცოცხლის მოსპობა გამოიწვია.
წყარო: www.ambebi.ge
