ტრაგედია სამი დღის წინ დატრიალდა. ახალციხიდან, კერძოდ ვალედან გავიდნენ დილით ადრე ცოლ-ქმარი ხვიჩა და ანა დარბაიძეები შვილებთან ერთად ბათუმის მიმართულებით, თუმცა სამწუხაროდ, გზაში მომხდარ ავარიას ისინი ემსხვერპლნენ. როგორც ოჯახის ახლობელი ჩვენთან საუბარში ამბობს, ხვიჩა დარბაიძე ადგილზე დაიღუპა, ხოლო მისი მეუღლე დღეს დილით გარდაიცვალა. ანა კლინიკაში ორი დღე ებრძოდა სიკვდილს, რომელიც უგონო მდგომარეობაში შეიყვანეს, სამწუხაროდ ექიმებმა მისი გადარჩენა ვეღარ შეძლეს. ახლა ექიმები მათი შვილების გადარჩენისთვის იბრძვიან.
“ხვიჩა და ანა, ჩემი მეგობრები იყვნენ. ოჯახებით ვმეგობრობთ და თავზარდამცემია ჩემთვის ეს ტრაგედია. ძალიან კარგი ადამიანები, სიცოცხლით სავსე ადამიანები აღარ გვყავს. მართლა მიჭირს მათზე წარსულში საუბარი და იმის გააზრება, რომ ჩვენს გვერდით აღარ არიან. ხვიჩა ბათუმში მუშაობდა ბოლო დროს, იქიდან ჩამოსულა სპეციალურად რომ მეუღლე და შვილები დასასვენებლად რომ წაეყვანა, მაგრამ იქამდე ვერ ჩააღწიეს. დილით 4 საათზე გასულან მანქანით ვალედან ბათუმის მიმართულებით, გზაში, ზესტაფონთან მოუხდათ ავარია, როგორც ვიცი მსუბუქი ავტომობილი, რომლის საჭესთან ხვიჩა იჯდა, სატვირთოს შეეჯახა და სამწუხაროდ ხვიჩა ადგილზე გარდაიცვალა. მძიმედ დაშავდა მანქანაში მყოფი მისი მეუღლე და შვილები. ანა უგონო მდგომარეობაში მყოფი გადაიყვანეს კლინიკაში, სამწუხაროდ ის გონზე მოუსვლელად დღეს დილით გარდაიცვალა. სამი შვილი ჰყავთ. როგორც ვიცი, სამივე თან ჰყავდათ. ბიჭი და გოგონა დაშავდნენ. გოგონა შედარებით უკეთესად არის, ბიჭს თავის არეში აქვს დაზიანება და ოპერაცია გაუკეთდა, როგორც ვიცი, ისიც მძიმედაა და ყველანი ვლოცულობთ, რომ ბავშვები გადარჩნენ. დასასვენებლად მიდიოდნენ, როგორც ვიცი. რამ გამოიწვია ავარია, ამ დეტალებს სამართალდამცავები დაადგენენ. არის ვარაუდი, რომ ხვიჩას ჩაეძინა, იმ დროს ყველას ეძინა მანქანაში და ეს საშინელი ავარია მოხდა. ხვიჩა ადგილზე იყო გარდაცვლილი. ანა უგონო მდგომარეობაში გადაიყვანეს კლინიკაში, მაგრამ სამწუხაროდ ვერც ანა გადარჩა. ბავშვები კლინიკაში რჩებიან. ღმერთმა ქნას გადარჩეს ორივე. არაჩვეულებრივი ოჯახი ჰქონდათ, ძალიან მშრომელი და კარგი ახალგაზრდები იყვნენ ხვიჩა და ანა. იმის გააზრებაც მიჭირს, რომ ისინი არ იქნებიან ჩვენს გვერდით. ყველა განიცდის, ყველა ტირის. საშინელი ტრაგედიაა. ამბობენ მანქანა რამდენჯერმე ამოტრიალდა და სატვირთო მანქანას შეეჯახაო. ძალიან მშრომელი, მშვიდი, კეთილი და ძვირფასი ადამიანები იყვნენ ორივე. განვიცდი. ახალციხეში ამ კვირაში 9 ავარია მოხდა. ძალიან ძნელია როცა უყურებ როგორი ახალგაზრდები ეწირებიან ავტოსაგზაო შემთხვევებს. ვუსამძიმრებ მათ ოჯახის წევრებს. 4 საათზე გასულან სახლიდან, ახალციხიდან და 8 საათისკენ ეს საშინელი ამბავი იცოდა მთელმა ქალაქმა. ძალიან დიდი ტრაგედიაა”,- ამბობს ჩვენთან საუბარში ახლობელი.
