“შევიტყვე სამწუხარო ამბავი, რომ მშობლიურ რაჭაში, სადაც ჩემი დანიელი მეგობრების ფონდი ბევრ საინტერესო პროექტს ახორციელებდა – “რუსული კანონის” მიღების გამო ერთი პროექტი შეჩერდა” – ამის შესახებ “ლელოს” ერთ-ერთი ლიდერი ბადრი ჯაფარიძე სოციალურ ქსელში წერს.
მისივე თქმით, აღნიშნულ ფონდს წლების წინ ხელმძღვანელობდა.
“მახსოვს ძალიან ბევრი პროექტი, რომლებიც რეგიონის ხელშეწყობისთვის განხორციელდა. სამწუხაროდ, პოლიტიკაში წასვლამ იძულებული გამხადა, დამესრულებინა ფონდთან საქმიანი ურთიერთობა.
ონში ბავშვთა სტომატოლოგიური კლინიკის აშენება და უფასო მომსახურება არ არის უცხოური ძალის ინტერესების გატარება! „ქართული ოცნების“ მიერ მიღებული კანონის მიხედვით კი დღეს აღნიშნული ფონდი უცხოური ძალის ინტერესების გამტარებლად ითვლება.
ეს არის “რუსული კანონის” შედეგი, რითაც ზიანდებიან ჩვენი ქვეყნის მოქალაქეები. მინდა დარწმუნებით გითხრათ, რომ 26 ოქტომბრის არჩევნებით, აუცილებლად შეიცვლება ეს რუსული რეჟიმი და ეს კანონი. აუცილებლად გაგრძელდება დაფინანსება და განვითარება ყველა იმ პროექტის, რომლებიც ჩვენი თანამოქალაქეების კეთილდღეობას ემსახურება“, – წერს ჯაფარიძე.
ცნობისთვის, ფონდმა „ფეა თრიიზმა“ გაავრცელა განცხადება და ონის მერიისთვის გაგზავნილი წერილი, სადაც უწყებასთან თანამშრომლობის გაწყვეტის შესახებაა საუბარი.
წერილში ნათქვამია, რომ ფონდი იძულებულია შეწყვიტოს 2023 წელს დაწყებული თანამშრომლობა ონის მუნიციპალიტეტის მერიასთან ონში ბავშვთა უფასო სტომატოლოგიური კლინიკის გახსნასთან დაკავშირებით.
მიზეზად დასახელებულია „უცხოური გავლენის გამჭვირვალობის შესახებ“ კანონის მიღება და განმარტებულია, რომ აღნიშნული კანონის თანახმად, შესაძლოა, ფონდს დააკისრონ ჯარიმები და შეუქმნან ფინანსური სირთულეები.
როგორც ფონდში აცხადებენ, სახელმწიფო სტრუქტურებთან თანამშრომლობის სივრცე აღარ დარჩათ. როგორც ფონდში განმარტავენ, ინფორმაცია ეხება ქალაქ ონში დაგეგმილი ბავშვთა უფასო სტომატოლოგიური კლინიკის გახსნას და არა ამბროლაურში არსებულ, უკვე ფუნქციონირებად, ფონდის კლინიკას.
წყარო: mix. metronome. ge
