თურქეთში, სასტუმროში გაჩენილი ხანძრის შედეგად დაღუპულთა რაოდენობა 66-მდე გაიზარდა, – ამის შესახებ ინფორმაციას Sky News-ი თურქეთის შინაგან საქმეთა მინისტრზე, ალი იერლიკაიაზე დაყრდნობით ავრცელებს.
თურქეთის შინაგან საქმეთა მინისტრის ცნობით, ხანძრის შედეგად დაშავებულთა რაოდენობა 51-ს აღწევს.
ხანძარი თურქეთის ბოლუს პროვინციაში, სამთო-სათხილამურო კურორტ კარტალკაიაში მდებარე 12-სართულიან სასტუმროში, ადგილობრივი დროით, 03:27 საათზე გაჩნდა.
ბოლუს გუბერნატორის აბდულაზიზ აიდინის განცხადებით, შემთხვევის დროს სასტუმროში 234 ადამიანი იმყოფებოდა და წინასწარი ინფორმაციის თანახმად, ხანძარი სასტუმროს მეოთხე სართულზე მდებარე რესტორანში გაჩნდა და ზედა სართულებში გავრცელდა.
ადგილობრივი მედიის ინფორმაციით, სულ მცირე, 2 ადამიანი დაიღუპა სასტუმროს ფანჯრებიდან გადახტომის შედეგად. გავრცელებულ კადრებში ჩანს ფანჯრებიდან გადმოკიდებული თეთრეული, რომელსაც ცეცხლმოკიდებული შენობიდან გასაქცევად იყენებდნენ.
სამაშველო სამუშაოები დილამდე გაგრძელდა.
სათხილამურო ინსტრუქტორმა ნეჯმი კეპჩეთუტანმა თურქულ ტელევიზიას განუცხადა, რომ მან გაქცევა მოახერხა, რადგან იცნობდა სასტუმროს, ხოლო სტუმრებს, რომლებმაც ის ისე კარგად არ იცოდნენ, არ გაუმართლათ.
“სასტუმრო კვამლში იყო გახვეული, რის გამოც სტუმრებს გაუჭირდათ სახანძრო გასასვლელების პოვნა. ხალხი ფანჯრებიდან ითხოვდა შველას, რადგან შიგნით ძლიერი კვამლი იყო. 20-25 ადამიანი გამოყვანა მოვახერხეთ“, – განუცხადა მან NTV-ს.
თვითმხილველები ამბობენ, რომ სასტუმროს ხანძარსაწინააღმდეგო სისტემამ გამართულად ვერ იმუშავა.
სასტუმროს მესამე სართულზე მცხოვრებმა სტუმარმა ატაკან ელქოვანუ ამბობს, რომ მისმა ცოლმა წვის სუნი ისე იგრძნო, რომ განგაშის სიგნალი არ ჩართულა.
“ზედა სართულებზე ხალხი ყვიროდა, დახმარებას ითხოვდა, ზოგი თეთრეულით ცდილობდა ხანძრისგან თავის დახსნას, ზოგმა გადახტომა სცადა“, – ყვება ის.
ტელევიზია NTV ვარაუდობს, რომ სასტუმროს ინტერიერის ხით მოპირკეთებამ, დააჩქარა ხანძრის გავრცელება.
ის ასევე იტყობინება, რომ 161-ნომრიანი სასტუმრო კლდეზეა, რაც აფერხებდა ხანძრის წინააღმდეგ ბრძოლას.
კარტალკაია არის პოპულარული სათხილამურო კურორტი ქოროღლუს მთებში, დაახლოებით 300 კილომეტრში (185 მილი) სტამბოლის აღმოსავლეთით. ხანძარი სასკოლო არდადეგებისას გაჩნდა, როდესაც რეგიონში სასტუმროები გადაჭედილია.
ადგილზე 30 სახანძრო მანქანა და 28 სასწრაფო დახმარების მანქანა მუშაობდა.
ხანძრის გამომწვევი გარემოებები ჯერჯერობით უცნობია. მომხდარის გამოძიება დაიწყო.
