თბილისის ზღვაზე ახალგაზრდა მამაკაცის ცხედარი იპოვეს. როგორც მოგვიანებით გახდა ცნობილი, გარდაცვლილი 25 წლის ნუკრი (კოკე) კოკუაშვილია. ბიჭის ცხედარი პოლიციამ ნახა.
ის დედოფლისწყაროს მუნიციპალიტეტიდან იყო და თბილისში ქირით ცხოვრობდა.
შსს -ს ინფორმაციით, საქმე 115-ე მუხლით აღიძრა, რაც თვითმკვლელობამდე მიყვანას გულისხმობს.
ambebi.ge გარდაცვლილის დას, ნინო კოკუაშვილს ესაუბრა. ნუკრი და ნინო სანზონაში, ნაქირავებ ბინაში ერთად ცხოვრობდნენ:
“ღამის 4-ის ნახევარზე დამიკავშირდა პოლიცია და მითხრეს, ადგილზე მოდითო. მათ შემატყობინეს ჩემი ძმის ამბავი. თემქაზე, ზღვაზე გამვლელებს უპოვიათ მისი ცხედარი. გამოძიება დაწყებულია, ისევ დამიბარებენ. მითხრეს, ექსპერტიზის პასუხი 45 დღეში იქნებაო. რა გაძლებს იქამდე…. ყველანაირად გამოვრიცხავ თვითმკვლელობას, ისეთი ბიჭი იყო, არანაირი პრობლემა არ ჰქონდა, ეს ნაბიჯი რომ გადაედგა. ძალიან კარგი ბავშვი იყო, მუშაობდა კაზინო “აჭარაში”, ყველანი იყვნენ მოსული, თანამშრომლები, ყველანი დადებითად ახასიათებენ ყველა ტიროდა. ყველა გაოცებულია და შოკშია.
არაფერი ვიცი, არაფერს მეუბნებოდა საერთოდ, ვერაფერს ათქმევინებდი, რომ ვკითხავდი, შეყვარებული გყავს თუ არა-მეთქი, მპასუხობდა, – შენი საქმე არ არისო. მეგობრები როგორ არიან-მეთქი და ხუმრობით მეტყოდა, – შენ შენს მეგობრებს მიხედეო… თამაშს გამოვრიცხავ, რამდენი წელია კაზინოში მუშაობს, თუ რამე მსგავსი ხდება, კაზინოები ასეთ თანამშრომლებს ათავისუფლებენ სამსახურიდან, ამას აუცილებლად გავიგებდით. არ ვიცი, ვინ რა გაუკეთა, 11-ში ღამით ტაქსით წავიდა სამსახურში და იქამდე არ მისულა, სამსახურში არ გამოცხადებულა. პოლიციამ რომ დამირეკა, არ დავიჯერე და მაშინვე სამსახურში დავრეკე, მითხრეს, – არ გამოცხადებულაო. ექსპერტიზამ ბიჭები არ დაასწრო, რომ ენახათ მისი ცხედარი, ჩაცმული ჩამოგვიყვანეს, ისე, ყელთან აქვს რაღაც დაზიანება, სხვა არაფერი ვიცით. ერთად ვცხოვრობდით სანზონაში ქირით და-ძმა. მეორე ძმაც მყავს. ნუკრი ძალიან მნიშვნელოვანი იყო ჩემთვის, არ ვიცი, როგორ გავაგრძელებ ცხოვრებას, როგორმე უნდა შევეცადო…”
წყარო: ambebi.ge
